បទចម្រៀងមួយបទរបស់ឧកញ៉ា ខេមរៈ សេរីមន្ត នៅក្នុងផលិតកម្ម កាឡាក់ស៊ី ដែលមានចំណងជើងថា “ទយៗ” កំពុងទទួលបានការគាំទ្រខ្លាំងពីស្រទាប់យុវវ័យ។ គិតត្រឹមថ្ងៃទី ១៥ ខែមីនា ឆ្នាំ២០២៣នេះ បទ ទយៗ មានចូលស្តាប់ចំនួន 1,1លានដងនៅក្នុង យូធូប។ 




បទ ទយៗ ជាស្នាដៃនិពន្ធ មេឡូឌី និងទំនុកច្រៀងដោយ លោក ខេមរៈ ភារុណ ដែលជាបងប្រុសបង្កើតរបស់ឧកញ៉ា ខេមរៈ សេរីមន្ត។ បទនេះ ជាចង្វាក់បែបរាំកម្សាន្ត សប្បាយៗ ដើម្បីត្រៀមអបអរបុណ្យចូលឆ្នាំថ្មី ប្រពៃណីជាតិខ្មែរ ដែលនឹងចូលមកដល់នៅពេលដ៏ខ្លីខាងមុខនេះ។ ក្រៅពីសាច់ភ្លេងពិរោះ និង គួរឱ្យចង់រាំ បទទយៗនេះ បានផលិត MV ដែលស៊ីអារម្មណ៍ សុទ្ធសឹងតែតួស្រីស្អាតៗ ពាក់ស៊ិចស៊ី រាំគ្រលែងចង្កេះ ធ្វើឱ្យអ្នកទស្សនាមើលមិនដាក់ភ្នែក។ 




គួរឱ្យដឹងថា តារាចម្រៀង ខេមរៈ សេរីមន្ត បានទទួលងារឧកញ៉ាពីព្រះមហាក្សត្រ កាលពីពេលកន្លងទៅ។ ក្រៅពីអាជីពជាតារាចម្រៀង ឧកញ៉ា សេរីមន្ត ក៏ជាអ្នករកស៊ីផ្នែកអចលនទ្រព្យម្នាក់ផងដែរ៕

ដោយ៖​ សីហរិទ្ធ